Sejarah ni Op. Raja Gumanti Simbolon

Administrator | , 01 September 2016 - 00:00:00 WIB | dibaca: 750 pembaca

Sejarah ni Ompu Raja Gumanti Simbolon

Ia Ompu Raja Gumanti ima anak palimahon manang anak siampudan tubuni Ompu Batu Holing, lima do anak ni Ompu Batu Holing ima:
1. Tuan Batangari
2. Tuan Milingiling
3. Tuan Lobe
4. Tuan Seul
5. Ompu Raja Gumanti.

Maringan do Ompui di Huta Pangururan di pinggir ni Tao Toba, pas dibonani dolok Pusuk Buhit.

Molo Sian Taromboni Ompungta Generasi Pasampuluhon (10) ma ibana molo ditarik sian Simbolon Ompu Raja Bolon songon nomor 1 (generas1/sundut 1)

A. Bungkas sian Pangururan

Dung borhat mangaratto parjolo hahana Tuan Lobe sinomor 3 dohot sinomor 4 Tuan Seul tu Pakkat (Parlilitan) gabe digoar ma ibana disi Tuan Pusuk, marpinompari do attong Tuan Seul on sampe 6 halak anakna na digoar mai si onom hudon (si 6 kodin) ima:

1. Tinambunan
2. Tumanggor
3. Maharaja
4. Turutan
5. Pinayungan
6. Nahampun.

Alai anggo hahana nomor 3 Tuan Lobe bukkas do tu Barus sahat tu Kota Cane / Aceh Tenggara mangararati do akka pinomparna. Holan Raja Gumanti nama naso borhat alai nungnga marpikkiri manang tudia do bolusonna. Dung marujung ngoluni omputta boru, bungkas jala manasar nasar ma muse Ompu Raja Gumanti jala Sahat tu Sampean di uruk bolon Sigaol, alai marhuta di Lumban Sigaol do Ibana.

B. Parborhat ni Op. Raja Gumanti tu Bakkara

Disadari ditingki lewat solu bolon namarlayar bolak balik sian Balige tu Pangururan, dihilap ibanama parsolui jala didok molo mulak hamu amang annon sian on Tulihon hamu ahu ala naeng dohot do ahu ninna tu parsolui. Mulak ma tutu Solu Bolon i ditulihon ma mangalap Op. Raja Gumanti.

Ala manompang songonido parmasuk ni imana, disuru parsoluima tu tonga-tonga asa manahui aek dirohani parsolui, alai didok Op. Raja Gumanti ma "Tamue do ahu amang di solu munaon ndang sisuru-suruon ahu, ingkon dijolo do ahu hundul" ninna laos maju ma imana tu jolo. (Doson mulaima dipatuduhon ilmu pitonggamnai).

Dung sahat tu Tuktuk Parhulean Bakkara Solu Bolon i, dipatuatma Op. Raja Gumanti hape pangidoanni Ibana taruhononna apala sahat tu Tuktuk Simangulape di Bakkara. Borat rohana turun alana holang dope tu Bakkara pardalananna. Tompu ma ro alogo bolon marhaba-haba ndang boi be attong marlayar Solu Bolon i, ingkon pasidingonna jolo unang gabe marmara.

Gabe dialap ma muse Op. Raja Gumanti ditaruhon sampe tu Tuktuk Simangulappe ala memang ido inganan paradianan ni parsolu molo ro alogo nabalga. Ala ndang adong dope keluarga tinandana di Bakkara tontu martahi do Op. Raja Gumanti mangalului soranganna (induk somangna). Dina mardalan-dalan ibana sahat jala jumpangsama sada huta ima hutani Raja Sinambela(Parbona ni Onan).

Dijabu ni Raja Sinambela ima jolo ibana tinggal jala burjudo ibana mangulahon siulaonna.

C. OP. RAJA GUMANTI PAULIHON TAGANING

Dasada-sada tingki muse tarbege ibana adong barita sada keluarga nanaeng paulihon Taganing, laos dipasungkunhon mai tu amanta Sinambela induk somangnai manang isedo nanaeng manumpan Taganing i. Dipaboa Induk Somangnaima Dibariba luat on doi ninna. Laos satongkin i dipaboa Raja Gumanti ma naboidoibana paulihon manang manumpan taganing, hatop ma attong dipabotohon induk somang nai naadong sada doli-doli dijabuna naboi pature taganing. Saut ma dipature taganing i dohot denggan las marohani Raja Sinambela mamereng Op. Raja Gumanti dihamaloonna nang sangapna pe.

Dilas ni rohani Raja Sinambela i tubu ma tu rohana naeng marhelahon Ompu Raja Gumanti alana dijolona pe adong boruna 7 halak. Denggan ma disukkun Raja Sinambela songon Riwayat hidupna, termasuk didia hutana, piga nasida marhaha maranggi, namora do dohot angka naasing dope. Ianggo alus ni Op. Raja Gumanti holan goarna dohot margana do dipaboa jala hutana di Pulo Samosir (dang dipaboa manang dihuta dia di Samosir i).

Dinapauli taganing ipe nungnga adong lohot tu rohana boru ni Raja Sinambela i, alai ndang barani ibana paboahon manang tu ise.

D. Op. Raja Gumanti Mambuat Boru Sinambela

Ala nungnga hira diboto Op. Raja Gumanti naeng parhelaonna ibana tontu molo tung sautpe pastima tu boruna siangkangan i patohoonna hape dang tusi lomoni rohana.

Dinasadari pas laho maronan onan angka boruni Raja Sinambela jala ingkon mangalewati sada batang aek/binanga ima binanga Somaila laos diittip ibana masian nadao, manang ise nasida naso manintak abitna ima nasaut parsinondukku inna rohana. Adong ma sahalak sian nasida naso manintak abitna tingki mamolus binanga i, ima Siboru Manambual.

Laoma tu rohani Op. Raja Gumanti molo boru tinodo ni rohana i paboaonna tu Raja ni Sinambela ndang mungkin paloasonna ala mangalakkai angka akkangna.

Dibuat Op. Raja Gumanti ma sada keputusan naingkon luahononna ma tu hutana di Samosir. Ndang borhat dope nasida namangaluai lao do tu rohani Op. Raja Gumanti naeng paboahon tu dongan sabutuha ni Raja Sinambela ima Raja Manullang. Alanion ma molo naeng mamboan sipanganon tu Raja Sinambela ingkon dua sipatupaon namargoar sada tu Raja Sinambela, sada tu Raja Manullang. Kawin lari ma nasida diboan ma Ompunta Boru tu Samosir, namora jala gabean do Ompungta.

Dung piga-piga taon nung diluahon Op. Raja Gumanti Omputta Boru martahi ma Raja Sinambela mangalului boru dohot hela nai. Disuru ma parsuruanna marsolu Bolon tu Samosir huhut mamalu Taganing dohot Ogung. Dung pas lewat sian Uruk Bolon suruan ni Op. Raja Sinambela tarbege Op. Raja Gumanti ma suara ni taganing mirip attong tu suarani taganing nahea pinaturena. Haruar ma Op. Raja Gumanti sian jabuna laos didapotton ma parsolui manang ise nasida jala aha maksudna. Dipaboa parsoluima nasuruanni Raja Sinambela do nasida nalaho mangalului boru dohot helana.

Ditogihon Op. Raja Gumanti ma parsolui sude tu jabuna dungi didokma" Hami do naniluluan munai amang, huhutma dijou Omputta Boru dohot Tolu dakdanak baoa jala sada dakdanak boru". Ia tubuni Op. Raja Gumanti siangkangan margoar: Op. Raja Pinalubung, sinomor dua Op. Raja Parhujogo, sinomor tolu Op. Raja Solobean. Siampudan ima boru namuli tu marga Samosir Simandihon.

Marlas ni roha ma nasida ala naung jumpang naniluluan dapot najinalahan . Laos rappak ma naside sude sian solu bolon i borhat tu Bakkara. Ndang tarsuhatan be las niroha ni Raja Sinambela manjalo nasida. Boruna, Helana dohot pahompuna na opat i. Marpesta bolon ma nasida, diara masude nadi Bakkarai dohot sian luat najonok tusi.

Dibege angka natorop i disungkun Raja Sinambela ma boruna manang aha pangidoanna sian natua-tuana, borat do rohani Ompunta Boru mangalusi sungkun-sungkun ni natorasnai ala ndang panagaman dirohana songon i dirohana. "Ndang tarjalo hami dope sian hamu amang ala on dope rohami manopot hamu, dapot do muse tingkina hami mangalap i", Parjolo ma Raja Sinambela mandok : Mas, Perak, Hepeng, Hauma, Horbo do dok hamuma sian i. Dialusi Ompunta Boru ma songon on, andorang so hudok dope hatakku Amang, dok hamu majolo "OLO" ninna ompunta boru. Hatop do dialusi Raja Sinambelai boruna: Olo ito dok hamu ma, ninna. Lehon hamu ma amang boanonku Ogung Oloan i nungnga las rohangku manjalo i. Dialusi Raja Sinambela ma: Ndang adong be huroha naummarga sipangidoonmu huhut muse molo boanommu. annon Ogung Oloan i gabe teal ma ogung i ai ndang saparangguan be. Alai manigor disambung Op. Raja Gumanti do hatani parsinonduknai laos didok lean hamuma amang pangidoanni boru muna i. Mambege hata ni Op. Raja Gumanti mamintor diolohon ma pangidoanni borunai huhut diumma.

Ogung Oloan on ma nagabe pusaka disude Pomparan ni Op. Raja Gumanti sahat tu saonnari on. Manang ise pomparanni Op. Raja Gumanti naeng margondang boido pangkeonna ogung i, laos denggan dope bentuk na, nang soarana pe manigor sadari on. Disimpan dihuta Pansur Simbolon.

E. Kekeluargaan

Soal kekeluargaan pe sahat tu saonnari on godang do pinomparni Op. Raja Gumanti nagabe sinonduk hela di Bakkara. Sude anak baoa pinompar ni Ompui molo naeng mambuat boru Sinambela manang didiape jumpangsa hasea do molo mambuat boruni Tulangta marga Sinambela. Hatani natua-tua mandok : Ida-ida jolma nabosur.......ima tutu.

F. RAJA JOLO RAJA SISUNGKUNON

Ia tinggal ni OP. Raja Gumanti di Lumban Godang Sigaol do songon naung pinatorang di ginjang. Alai disada tingki disornop aek Tao Toba ma Lumban Godang, laos pinda ma Op. Raja Gumanti tu Siambalo di Dugul.

Masa ma logo ni ari mansai leleng situtu di Samosir. Pola do dang tubu suan suanan. Tarboto ma tuangka raja bius na adong Raja Nasiat Marpangidoan tu na marhuaso. Ditopot pangitua ni luat i ma Ompu Raja Gumanti.Dipaboa pangituaima lapatan ni haroro ni nasida didok : Huboto Hami Raja Nami Raja Nasiat Marpangidoan do hamu, asa unang mate somangan pangisi ni luat on ala ni logo ni arion , tung asima rohamu , asa Rajai mangido udan asa boi tubu suan-suanan.

Didok Op. Raja Gumanti ma mangalusi Pangitua i, sian nasa rohamuna do mandok hatamuna on?. Dialusi Pangituama: Ido Raja Nami. Attong Ingot hamu ma"Ahu ma Raja i jolo" manang aha angka ulaon nauli di luat on!. Rap mangundukkon ma angka pangitua i mangoloi pandohan ni Raja Gumanti. Antong mulak ma hamu, ditonga dalan dope hamu nungnga robe pangidoan muna i.

Toho ma tutu, ditonga ni dalan dope angka pangitua i, nungnga ro udan mansai doras situtu. Ai na dipangido Op. Raja Gumanti do asa logo ni ari asa boi nian ingananna muse hutana nadi Lumban Godang ima nasinornop ni aek Tao Toba i. Anggo suan suanan naso tubu alani logo ni ari ndang pola dipingkiri ibana, holan hutana ido nasai dihalungunthon rohana. Gabe mabiar huhut patuh ma Pangituai dohot Raja Bius nadi Simbolon tu ompunta Op. Raja Gumanti. Sai marpanungkun do pangisi ni luat i tu Ompu Raja Gumanti molo adong Pesta dohot angka naasing. Tarida doi rodi tu anak ni Op. Raja Gumanti, Ganup Pinompar ni Op. Raja Gumanti dibahen do sada "Raja Jolo". Ise pe marulaon ingkon marsungkun ma tu Raja Jolo, sai pomparanni Op. Raja Gumanti ma Raja Sisungkunon.

G. Huaso Dohot Harajaon

Op. Raja Gumanti do nampuna harajaon (Pemerintahan) manang huaso Partanoon manang Golat Hatihai di Negeri Simbolon tarida doi sian Kantong-kantong huaso ni pinomparna nagabe Raja Ihutan dohot kepala Nagari
1. Op. Tuan Raja mai di Dugul
2. Op. Raja Silo mai di Purba-Londut
3. Op. Solobean mai di Uruk Bolon dohot Sigaol
Ia Op. Raja Gumanti dohot Omputta Boru marujung ngolu di huta Dugul di Negeri Simbolon do, holi manang saring-saringna dibatu napir nadi Pansur do. Laos disido Omputta na tolui udeanna.

H. Pomparanni Op. Raja Gumanti Mulak tu Pangururan

Borhat do Pomparanni Op. Raja Gumanti tu Pangururan naniuluhon ni Ninina Op. Raja Mallongos didongani ondok-ondokna Op. Datar dohot Op. Solobean laho mambuat tano bekas dohot hak milik na tininggalhon ni Tuan Batu Holing.

Sude do tano dohot hak milik Tuan Batu Holong nungnga dikuasai angka marga naasing. Gabe ingkon marporang nama nasida mambuat tano i. Mansai balga do parporangan i, ai dohot do mangurupi Op. Raja Mallongos Parangan ni Raja Sinambela sian Negeri Bakkara, Parangan ni Pasaribu hula-hula ni Op. Datar sian Negeri Harian Boho dohot janji martahan, Parangan ni Nainggolan Lumban Raja hula-hula ni Op. Solobean dohot Naibaho Tulang ni Op. Raja Gumanti na adong di Negeri Pangururan.

Marhuaso do muse pinomparni Op. Raja Gumanti ima Raja Mallongos dohot anakna naduai di Pangururan. Op. Datar di Huta Godang dohot Pangambatan. Jala Op. Solobean ma dihuta Lintong sahat tu si Jambur. Songoni Pardalanna asa gabe adong pinompar ni Op. Datar dohot Op. Solobean marhuta dohot martano di Negeri Simbolon songoni nang di Pangururan pe.

Nang diluat naasing pe tong do marhuta Pomparan ni Op. Raja Gumanti, songon:
1. Huta Gumba diatas ni Nainggolan
2. Lumban Simbolon di Porsea
3. Lumban Simbolon di Tamba
4. Lumban Lintong di Pangururan
5. Silosung Dugul di Paropo
6. Huta Ompu Barita di Sihotang
7. Sibaganding Simbolon di Bakkara

Parmondingni Op. Raja Mallongos

Op. Raja Mallongos monding di Pangaruran do, alai dang ditanom di toruni tano, tong do denggan disimpan bakkenai dibagasan poti, martaon-taon lelengna. Marganti ganti do ingananna sipata di Negeri Simbolon jala sipata di Pangururan.

Alai dung ro Bolanda gabe dioraima disimpan dibagas jabu laos ditanomma huhut dibahen tambakna ima nadi Hutagodang Pangururan.

Dipajongjong do Batu na Pir (TUGU) ni Op. Raja Mallongos di Pangururan laos dipestahon 7 ari 7 borngin nadi taon 1975 i (12-0901975 - 18-09-1975).

Songonido Sejarah ni Ompungta Op. Raja Gumanti na tinuturhonni angka Natua-tua dohot naumbotosa sian Pinomparni Op. Raja Gumanti tu Panurat / Tim Penyusun.

Panimpuli


Manang behape sai adong do hurang lobi di panurat. Alanii arop situtudo roha diangka amanami, inanami nang Boru dohot Bere pe pinompar ni Op. Raja Gumanti, naolo padengganton asa lam tu dimposna Sejarah on nagabe boi muse botoon ni generasi naumposo / Penerus.

Songon nidokni Umpasa ma dohonon:
PAGO-PAGO TARUGE PAUK-PAUK NI HUDALI ANGKA NASEGA PINAULI, ANGKA NADENGGAN NI ULAHI

BALINTANG MA PAGABE TUMUNDALHON SI TADOAN, SAUT MA HITA POMPARANNI OMPU RAJA GUMANTI GABE MAULI BULUNG HUHUT MARSIPAOLO-OLOAN.

SAHAT-SAHAT NI SOLU SAI SAHATMA TU BONTEAN.
NUNGNGA SAHAT SEJARAH NI OMPUNTA ON TUHITA, SA SAHAT MA HITA TU PARHORASAN PANGGABEAN.

Sumber: Buku Tarombo & Paradaton Pomparan Ompu Raja Gumanti Simbolon Tuan Nahodaraja.